Une tragjedie fate di sanc e podê

Daniele Pecci al è il regjist e il protagonist di “Macbeth”, une des tragjediis plui interpretadis e cognossudis di William Shakespeare. La comedie e sarà rapresentade par cinc seradis tal circuit dal ERT: martars ai 2 tal Teatri “Miotto” di Spilimberc, miercus ai 3 tal “Modena” di Palme, joibe ai 4 tal teatri “Sociale” di Glemone, vinars ai 5 tal “Candoni” di Tumieç e sabide ai 6 a Cividât, tal “Ristori”. Scrite par Shakespeare tal 1606, la tragjedie e met in sene lis consecuencis fisichis e mentâls de ambizion e de gole di podê. Il drame al conte la cressite e la disfate dal gjenerâl scozês Macbeth, che al cope il re Duncan par cjapâ il so puest. “Ce che al è stât fat nol pues jessi disfat”, a son lis peraulis centrâls, parcè che di li no si torne indaûr: “une volte che tu sês dentri tal sanc, tu âs dome che di lâ indevant intune spirâl che no si ferme mai”. (A.I.) – 01.12.2025