Une produzion de Fvg Orchestra pai 50 agns dal taramot

La Orchestre dal F-Vj e sarà protagoniste de produzion di un musical liric dedicât al cincuantesim aniversari dal taramot. Chest progjet bienâl intitulât “Io sono Friuli – 55 secondi” (jo o soi Friûl – 55 seconts) al sarà un memoreament dai events tragjics dai 6 di Mai al 1976, “ma ancje un spetacul par contâ ducj i cambiaments che a son stâts vie pai agns, mostrant il cambiament dal Friûl arcaic di prime dai agns Setante intun Friûl moderni, plui fuart e al centri de Europe”. A son lis peraulis di Mario Anzil, assessôr regjonâl ae Culture, daspò dal acuardi cu la Orchestre, che e cjaparà un contribût straordenari di 204 mil euros pal meti adun une produzion liriche musicâl. La Orchestre dal F-Vj e je nassude tal 2019 par racuei la ereditât musicâl di diferentis realtâts di une zone plene di tradizions, e tal 2022 e à vût ancje il ricognossiment de bande dal Ministeri ae Culture. (A.I.) – 23.04.2025