Une “orchestre dentri di une orchestre” di liende

Un event memorabil – e za cence nancje un puest libar – al è in program martars ai 5, aes 8 e mieze sot sere tal Teatri “Verdi” di Pordenon, che si vierzarà par une esclusive di un dai grups plui straordenaris e celebrâts su la sene musicâl internazionâl, I dodis violoncei de Filarmoniche di Berlin. Nassûts cuasi par câs tal 1972 daspò di une produzion radiofoniche dal “Imni” di Julius Klengel, i dodis violoncei a son deventâts vie pal timp une vere liende musicâl, une “orchestre dentri di une orchestre” buine di tornâ a definî i confins espressîfs dal lôr strument. Daspò di passe cincuante agns di ativitât, a sunâ ator par ducj in cinc continents, cjapant i premis plui grancj, a son une presince costante ancje tai spazis istituzionâi e tai lôr concierts a contin une storie di ecelence assolude e une evoluzion che no si ferme. (A.I.) – 04.05.2026