Une maratone di musiche sot sere tal “Tomadini”.

Une maratone di musiche buine par saludâ l’Istât che al rive, tal cûr di Udin, dal tramont fint a miezegnot: cheste e je la “Tomadini Open Night”, che e torne propit tal dì dal solstizi dal Istât, domenie ai 21. Daspò dal sucès de Zornade Vierte dal mês di Mai, la fieste de musiche e torne te Istituzion pe Istruzion Musicâl Superiôr intune session speciâl sot sere, tal zardin dal Conservatori Tomadini, in Zardin Grant. La gnove diretore dal Conservatori, Cristina Nadal, e darà il benvignût al public de citât, adun cul president, Guglielmo Pelizzo, pe tierce edizion dal event. Un invît viert ae citât: une oportunitât par imparâ alc di plui ator tal Conservatori, par scuvierzi i siei talents e sperimentâ la musiche tant che une esperience coletive, acessibil a ducj. (A.I.) – 20.06.2026