Un spetacul di danze pal viaç dai migrants

Musiche e danze si instrecin in “Sabir”, la ultime creazion dal coreograf talian african Mvula Sungani, che al conte cul lengaç evocatîf de art il viaç di feminis e oms costrets a frontâ il mâr par scjampâ a vueris e a cjaristiis. “Sabir, viaç mediterani” al sarà ospit par trê seradis intal circuit dal ERT: martars ai 10 tal Teatri Italie di Pontebe, miercus ai 11 tal Auditorium “Marin” di Grau e joibe ai 12 tal Teatri “Odeon” di Tisane. Sui trê palcs regjonâi si esibiran i danzadôrs de Mvula Sungani Physical Dance cu la stele Emanuela Bianchini. Il lavôr al nas de idee che une integrazion legâl e puedi jessi une risorse preziose, propit cemût che al sucedeve plui di mil agns indaûr tra i navigants di diviers Paîs che, par comunicâ intai puarts dal Mediterani, a vevin sintût la dibisugne di creâ une lenghe condividude: il Sabir. (A.I.) – 09.12.2024