L’atôr Marco Paolini al esplore lis contradizions de sô gjenerazion a sun di musiche e cun umorisim, dant vôs, anime e cuarp aes tantis storiis di un passât che al è dongje e ancje lontan. Il spetacul “Boomers” in program li dal Teatron al è un salt intai ricuarts, intai framents di memoriis spartidis di un piçul mont, nancje masse antîc, ma finît, sepulît inte trasformazion svelte dal paisaç, dal costum, de dipendence di tecnologjiis portatilis. Dut si davuelç intal bar de Jole, ven a stâi Patrizia Laquidara, autore des cjançons origjinâls. Il spetacul, in program miercus ai 24 tal Teatri gnûf “Giovanni da Udine”, aes 11 pai students e aes 8.30 sore sere par ducj, al è stât scrit cun Michela Signori e al ven fûr de esperience di un autôr che al à fondât su la memorie une part impuartante dal propri lavôr e che vuê si interoghe su cuâi che a sedin lis rispuestis pussibilis dal teatri a un mont là che lis esperiencis virtuâls e reâls a son simpri plui messedadis, cence une clare separazion. (A.I.) – 22.01.2024
Foto di G. Moretto
