Dal prin ai 5 di Lui, lis tardis e lis placis di Udin a deventin un palc par dâ acet al festival “AreaDanza_urban dance festival”, ideât de compagnie Arearea di Udin cu la poie de Regjon, dal Comun di Udin e dal Ministeri de culture. Balâ in ducj i puescj pussibii e no dome dentri dai teatris al è simpri stât tal cjâf de compagnie udinese fondade di Roberto Cocconi tal 1993 e vuidade cun Marta Bevilacqua. Il cartelon curât di Bevilacqua e Cocconi al vûl valorizâ la pluralitât de sene taliane contemporanie, cu lis presincis di autôrs di nivel. Si tache martars al prin di Lui cu la presentazion di dut il program te Galarie “Tina Modotti” e la scree di “5500”, mostre di fotos di Alice Durigatto fatis dal ultin an par Arearea. Di joibe a tachin i spetacui e il gnûf progjet “Le vie di carta” (Lis stradis di cjarte), firmât di Marta Bevilacqua cun Loredana Parrella e Yoris Petrillo, interpretât dai danzadôrs di Arearea adun cun chei de compagnie Twain Physical Dance Theater. (A.I.) – 30.06.2025
Foto di A. Durigatto
