Un palc “classic” par zovins di talent

E je la plui vecje rassegne musicâl dedicade ai concierts dai musiciscj di classiche des zovinis gjenerazions. “Musicainsieme” a Pordenon e je rivade ae cuarantesime cuarte edizion, inmaneade dal CICP, il Centri Iniziativis Cultuâls de citât, cu la direzion artistiche di Franco Calabretto e Eddi De Nadai. Un puint di notis che, une domenie daspò di chê altre fint ae Vierte, al puarte sul palc zovins di talent, za premiâts in concors talians e internazionâi e pronts par une grande cariere. Cinc i apontaments in cartelon dal prin di Fevrâr e fint ai 8 di Març, simpri di buinore tal auditorium dal centri culturâl de Cjase dal student “Antonio Zanussi” di Pordenon. La scree cuntun musicist za celebrât, ancje se une vore zovin, il violoncelist Ettore Pagano: une stele internazionâl a dome 23 agns, cirût des plui impuartantis orchestris, “miôr solist” 2025 pal “Premi Abbiati” e simpri a sunâ ator pal Mont. Pe ocasion, al sarà in cubie cul pianist austriac Maximilian Kromer, musicist di grant nivel. Pai altris concierts a son stâts clamâts il flautist e ricercjadôr Andrea Magris, Nicola Bertolini e Irina Kravtchenko, il Così String Quartet e il Duo Impuro di Samuele Molinari e Celeste Sartori, vincidôrs dal Concors Internazionâl di Palme. (A.I.) – 31.01.2026