Un omaç a Brigitte Bardot a Glemone

Tal Cine “Sociale” di Glemone, la serie di cines de Cineteche dal Friûl dedicade al produtôr venezian Gianni Da Campo (1943-2014), che al à donât la sô grande colezion ae stesse Cineteche, e va indevant miercus ai 4 aes 8e mieze sot sere cun “La ragazza del peccato” (La fie dal pecjât) di Claude Autant-Lara, gjavât fûr di un romanç di Georges Simenon. Da Campo al veve curât une biografie di Simenon, che lui al considerave un dai plui grancj scritôrs dal vincjesim secul. Si che duncje e je nassude la pussibilitât di cjapâ dentri de rassegne curade di Sergio M. Grmek Germani ancje cualchi cine gjavât fûr dai lavôrs dal scritôr belgjic. “La fie dal pecjât” (1958) e à tant che protagoniste Brigitte Bardot adun cun Jean Gabin, intun dai personaçs feminins plui sensuâi e cence inibizions rapresentâts di Simenon. (A.I.) – 03.02.2026