Un mestri dal piano classic al torne tal Palamostre

Cuntun program intitulât “Incjants e incjantesims”, il pianist Roberto Cappello al torne tal Palamostre di Udin pal gnûf event dai Amîs de Musiche di Udin. La stagjon numar 104 e va indevant cuntun recital dal grant musicist, miercus ai 25 aes 7.22 di sere (ven a stâi: 19.22, tant che l’an di scree de associazion ), par un program che al rapresente un incuintri di Est e Ovest, de Russie ae Californie. Une tecniche trassendentâl, une sensibilitât artistiche e spirituâl rafinade, e un impegn costant sedi culturâl che inteletuâl te sielte dal repertori, Roberto Cappello al è in prime linie inte musiche internazionâl, cun passe trê mil concierts fats di solist, cun orchestris e cun grups di cjamare in dut il mont. (A.I.) – 24.03.2026