Un laboratori par fâ teatri par furlan

Il diretôr artistic dal Teatri Stabil Furlan, Massimo Somaglino, lu veve dit cuant che a vevin screade la gnove sede: “Cumò che o vin un spazi, bisugne fâlu funzionâ”. E cussì al è. Dongje de stagjon “Savôrs”, che di chest an si davuelç cuasi dute de sede di va della Vecchia Filatura a Torean di Martignà, e lis provis pes gnovis produzions che a son daûr a debutâ, la sale si vierç a gnovis iniziativis, simpri par furlan. Di Març a Jugn al tache il laboratori “Lenghe mari” cun Nicoletta Oscuro e Hugo Samek, par cuatri fin de setemane te sale grande dal TSF, vuidât di Nicoletta Oscuro, atore, cjantante e insegnante une vore preseade e Hugo Samek, autôr, musicist e balarin, nassût in Argjentine ma di agnorums achì. Il laboratori al sarà une palestre par atôrs e atoris, regjiscj ma ancje cui che al è dome passionât di teatri e che al vûl fa ricercje, sperimentâ, lâ a cirî la sô energjie (par informazions: prenotazioni@teatristabilfurlan.it). Dai 21 di Març, cuntune metodiche contemporanie ma ancje lis fondis de pratiche teatrâl, si vierç il laboratori par cui che al a voie di metisi in zûc in libertât doprant il cuarp e la vôs, massime la lenghe mari: furlan o talian, ma ancje rus, rumen, polac… (A.I.) – 15.03.2026