Un gnûf diretôr al Ert: Bevilacqua al puest di Manzoni dopo 18 agns

Alberto Bevilacqua al è il gnûf diretôr dal Ente Regjonale Teatrale dal Friûl Vignesie Julie. Fondadôr e president dal CSS – Teatri stabil di inovazion dal Friûl Vignesie Julie, Bevilacqua al sotentre a Renato Manzoni, in cjarie par plui di 18 agns, che al starà dongje dal gnûf diretôr fintremai ae fin dal an. La sielte dal Consei di aministrazion dal Circuit ERT, cul president Sergio Cuzzi, e je colade su Bevilacqua al tiermin di une selezion midiant bant di concors che si è fate intal cors dal Istât e e à viodût la partecipazion di 20 professioniscj dal setôr di dute Italie. Bevilacqua al è stât ancje diretôr artistic, diretôr organizatîf e president dal CSS, membri de scuadre che e à impuestât e vuidât la ativitât dal Teatro Nuovo Giovanni da Udine e diretôr de Associazione Mittelfest. Dal 2010 al è vicepresident de AGIS (Associazion Gjenerâl Taliane dal Spetacul) pal teritori des “Tre Venezie”. (A.I.) – 02.11.2022