Un curtmetraç al conte la galarie, za ripâr de vuere

Si podarà viodi vinars ai 26 aes 6 di dopomisdì, te Sale dal Consei dal Comun di Monfalcon, il curtmetraç “Memorie dissepolte” (Memorie dissepulidis), prodot par Terroirfilms e diret di Michele Pupo. La pelicule e conte il progjet di viertidure da Galarie Ripâr de Seconde vuere mondiâl midiant des testemoneancis di chei che a àn vivût chê esperience te citât dai cantîrs. Un simbul de memorie coletive di Monfalcon, la Galarie Ripâr e je un bunker sot tiere lunc 270 metris, che al à dât ripâr a miârs di personis vie pai bombardaments dal 1944 e dal 1945. Sierade par decenis, la galarie e je tornade a jessi acessibil in gracie di un intervent restaur e di valorizazion une vore impuartant. Daspò de proiezion al sarà pussibil fâ une visite cence sore nuie de Galarie Ripâr, vuidâts di Pietro Commisso, creatôr dal percors espositîf de Galarie. (A.I.) – 25.06.2026