Un conciert fat dome di feminis

Un cuartet di arcs cul piano pal grant finâl di “Contrappunti” (Cuintriponts), la rassegne dal Teatri “Verdi” di Pordenon dute intal segn des gnovis gjenerazions, che e cjape dentri musiciscj zovins in dialic cun stimâts mestris. Miercus ai 23 si siere cuntune serade che e celebre il talent feminin in musiche, cuntun program che al unìs cuatri interpretis zovenonis e une pianiste di grande innomine. Il tercet formât des sûrs Elisa e Giulia Scudeller (violin e viole) e de violonceliste Veronica Nava Puerto, si complete cu la contrabassiste Angelica Gasperetti. A chestis musicistis zovinis si zonte la pianiste Gloria Campaner, une des figuris plui sflandorosis de sô gjenerazion, che intai ultins agns e à dedicât une gruesse part de sô ativitât a progjets par musiciscj emergjents. Il conciert, intal segn de emancipazion e dal riscat feminin, si vierzarà cu la esecuzion di une opare di rare scolte: il tercet par arcs di Ethel Smyth, compositore, scritore e ativiste inglese. (A.I.) – 22.04.2025