Un classic di Pirandello tal circuit dal ERT

“Il fu Mattia Pascal”, il romanç di Luigi Pirandello publicât tal 1904, al torne intal circuit dal ERT intune version teatrâl direte di Marco Tullio Giordana, cun Geppy Gleijeses tant che protagonist te part di Mattia Pascal/Adriano Meis. La comedie e sarà rapresentade martars ai 25 tal Teatri “Odeon” di Tisane e miercus ai 26 tal Teatri “Benois De Cecco” di Codroip. Po dopo al tornarà in regjon ancje tal mês di Dicembar, tal teatri “Marlena Bonezzi” di Monfalcon. “Il fu Mattia Pascal” al è il romanç che al à puartât innomine a Pirandello in dut il mont e al à fat deventâ impuartant il teme dal “dopli” pe leterature dal vincjesim secul. Considerât une “farse”, al reste un test ancjemò di atualitât in graciis des sôs riflessions ator de identitât, i rûi sociâi e il desideri di scjampâ e di tornâ a nassi. (A.I.) – 24.11.2025