Un classic de oparete daspò di cent agns

Principis e principessis, Paîs esotics, une storie di amôr e soredut tante musiche otime: domenie ai 6 e je di sene tal Teatri gnûf “Giovanni da Udine” la oparete “Cin Ci Là”, ultin apontament che la Stagjon firmade de diretore artistiche Fiorenza Cedolins e dediche a chest gjenar musicâl cussì preseât. Creade de pene dal compositôr Carlo Lombardo, calcolât il “pari“ dal teatri in musiche talian, e dal talent di Virgilio Ranzato, un autôr di chê volte za cognossût e preseât, la oparete “Cin Ci Là” e je stade rapresentade pe prime volte a Milan cent agns indaûr, ai 18 di Dicembar dal 1925. Atmosferis elegantis, i rivocs di un Orient Estrem di flabe e soredut lis musichis in voghe intai agns Vincj dal secul passât a tornin a vivi intun spetacul elegant ufiert di Teatro Musica Novecento pe regjie di Alessandro Brachetti. (A.I.) – 05.04.2025