Ai 28 di Dicembar, tal teatri “Palamostre” di Udin, e rive la prime assolude di un classic dal repertori mondiâl dal balet, “Lo Schiaccianoci” cu lis musichis di Pëtr Il’ič Čajkovskij, ma inte leture contemporanie de coreografe Marta Bevilacqua e di Arearea, al so prin confront cuntun classic, instreçant fedeltât poetiche e un voli contemporani. Lo Schiaccianoci al è simpri stât preseât di ducj pes musichis di incjant di Čajkovskij e pe narazion fantastiche, che e mude il piçul soldadut di len intune icone des fiestis di Nadâl, adun cul om misteriôs che al è protagonist, i zugatui che si movin di bessôi vie pe gnot e un viaç tal mont de fantasie par une frute che no dismentearà plui che gnot. La version di Arearea e je nassude di un studi frontât par dut l’an e la scriture des danzis e je in linie cu chê de compagnie, doprant dutis lis sieltis di stîl che a fasin part de lôr storie, in dialic cu la musiche origjinâl, mudant dut câs il classic intune vision vive, vivarose e di vuê. (A.I.) – 26.12.2025
Foto di A. Rizzi
