Un cine su la nazionâl feminine di balon ‘dismenteade’

Sul schermi dal “Visionario” di Udin a rivin trê documentaris par trê storiis di sport, veris e di no crodi, dal dut fûr dai schemis. Trê esemplis di epiche moderne che a contin la brivade di trê desideris. Si scomence joibe ai 30 cun “Copa 71”, presentât in anteprime tal “Pordenone Docs Fest”, che al conte il prin mondiâl di balon feminin, discognossût de FIFA e dislontanât de memorie coletive. La proiezion e varà tant che ospite di ecezion Elena Schiavo, furlane di Merêt di Tombe e cjapitane di liende de Nazionâl feminine taliane contade propit intal documentari. (A.I.) – 29.05.2024