Un cine-concert di solidarietât cu la Ucraine

Un messaç di sperance e solidarietât dal mont dal cine furlan in timps di vuere in Europe. “Le giornate del cinema muto” e Cinemazero di Pordenon, il Visionario di Udin e la Cineteche dal Friûl di Glemone a presentin il cine-concert “Vesnoi / Navesni / A Vierte”, un cine dal 1929 che al conte la fin dal Invier e il disglaçament in Ucraine. Trê lis datis dal event: miercus ai 13 di Lui te arene Cimolai di Pordenon, joibe ai 14 a Udin te arene Loris Fortune e vinars ai 15 a Glemone intal parc di via Dante. La proiezion e sarà imbinade cu la musiche dal vîf dai todescs Ulrich Kodjo Wend ae armoniche e Anis Wiemann al saxofon e flaut. (A.I.) – 13.07.2022