Ultin conciert par “Musicainsieme” cuntun duet zovin

Il Duet Viridian, cu la zovine violiniste Sofia De Martis e il pianist Matteo Di Bella, al siere il cartelon de cuarantesime otave edizion di “Musicainsieme”, la vetrine di musiche di cjamare dal CICT, il Centri Iniziativis Culturâls di Pordenon, direte e curade di Franco Calabretto e Eddi De Nadai. Domenie ai 9 aes 11 di buinore, intal Auditorium de Cjase dal Student “Antonio Zanussi”, il program musicâl al alternarà pagjinis di riferiment des sunadis par violin di grancj compositôrs: Mozart, Schumann e Beethoven. Il Duet Viridian al nas intal 2023 e cumò al studie intal Conservatori “Tartini” di Triest, ma al è stât za protagonist in cualchi festival e in ocasions impuartantis in svariadis citâts, vuadagnant doi prins premis a Padue e al Concors internazionâl “Citât di Palme”. (A.I.) – 08.03.2025