Udin&Jazz: ve che si tache

Daspò de grande anteprime cul ghitarist Pat Metheny, la trentesime seste edizion di “Udin&Jazz”, curade di Euritmica cul supuart dal Comun di Udin, e je in plene vore. Joibe ai 9, il festival al scomence cuntune zornade lungje che e finìs cuntun conciert di Kurt Rosenwinkel, un dai ghitariscj plui influents dai ultins agns, programât pes 9 e mieze sot sere te cort di palaç Morpurgo. “The Remedy Reunion Tour” al è un progjet che al torne a meti dongje pe prime volte in vincj agns il grup che al e jere stât protagonist di un album innomenât te storie dal jazz, regjistrât dal vîf tal Village Vanguard intal 2006. I concierts a tachin za aes 7 di dopomisdì tal parc Moretti, a jentrade libare cence sore nuie, là che al sarà presentât “Joni… Beyond Blue – For Joni Mitchell”, un progjet une vore fin, dedicât a une des plui grandis cjantautoris de musiche contemporanie, vuidât de vôs di Lorena Favot. A misdì te ostarie “Alla Ghiacciaia”, il prin event colaterâl cul prin apontament de schirie di “aperitîfs jazz”. (A.I.) – 08.07.2026