Ducj i puescj a disposizion pal “Conciert dal disveâsi” di Udin, in program sabide ai 5 di Lui, a son finîts In mancul di 24 oris,. Aes 7 di buinore sul plaçâl dal Cjistiel a saran almancul doi mil a scoltâ il pianist pordenonês Remo Anzovino, che propit dîs agns indaûr al veve screât la iniziative, fate cheste volte di Vigna Pr cun FVG Music Live e il Comun di Udin. Une invenzion che aromai e je deventade une tradizion, cetant preseade tal câs di Remo, un dai protagoniscj de musiche strumentâl contemporanie, za premiât pes sôs musichis pai cines di art e dal public che al à jemplât il so tour talian tal disc “Atelier”; regjistrât l’an passât dal vîf tal studi dal artist furlan Giorgio Celiberti. Daspò di Udin, Anzovino al sunarà a Copenhagen, po dopo ator pe Italie, daspò de fin dal Istât, par trê datis fintremai in Gjapon! (A.I.) – 04.07.2025
Foto di P. Grasso
