Trê mês di concierts ator pal Friûl

La lôr stagjon di musiche classiche e di cjamare fate vie pal Invier in citât e dure di passe cent agns, ma di cualchi timp la associazion dai Amîs de musiche di Udin e à decidût di zontâ ancje une rassegne siore di apontaments che e va indevant par dut l’Istât e sul dut il teritori de regjon, de monts al mâr. “Friuli concertante” al è un omaç a une tiere che e je crosere di culturis e plene di tradizions, liendis e lenghis diferents. Une stagjon musicâl lungje che e va indevant par cuasi cuatri mês, cui concierts e i programs e i artiscj sielts a pueste pe acustiche dal lûc che al devente un pal: arenis tal vert, tes valadis, dilunc des aghis, tai filârs di vît, ma ancje museus, glesiis, salutis, alternant i concierts dentri e chei tal viert. La diretore artistiche Luisa Sello e vûl tirâ dentri i spetatôrs in lûcs unics e di incjant, pe bielece de architeture o de nature. Si tache martars ai 23 di Jugn, te Basiliche di Grau cu la orchestre Naonis-Donatello e po dopo, di Lui e fint a Setembar, la musiche di orchestris, cuartets, tercets, duets e soliscj e rivarà di ogni bande, di Aquilee a Zui. (A.I.) – 22.06.2026