Teardo a Gurize cun Elio Germano

Nassût a Pordenon tal 1966, di agnorums a Rome par lavorâ massime pal cine, autôr di musichis che a àn vinçût plui di cualchi premi, Mauro “Teho” Teardo al à metût su di cualchi timp ancje une cubie cul preseât atôr Elio Germano. Daspò di vê puartat in sene cun grant sucès “Il sogno di una cosa”, il romanç di Pier Paolo Pasolini tal Friûl dal daspò vuere, cumò al è impegnât – dongje di meti adun lis musichis par “Portobello” – a teatri cuntun gnûf spetacul. “Una persona alla volta”, une persone par volte, che joibe ai 19 al rive tal teatri “Verdi” di Gurize, e je la conte di un vite impegnade cuintri la vuere: chê di Gino Strada. Lis peraulis dopradis tal libri par contâ il passaç di un zovin miedi in prime linie a fondadôr di Emergency a son une riflession ator des consecuencis de vuere e dal dirit universâl ae salût. L’atôr e il musicist a puartin indevant – un cu lis peraulis, chel altri cu la musiche – une narazion passionade di un om che al à simpri puartât indevant la sô idee: salvâ vitis vitis e lotâ pai dirits di ducj. (A.I.) – 18.02.2026