Tal studi di Celiberti un conciert di là dai confins

Un incuintri di culturis, gjenerazions e lenghis artistichis tal spirt di dialic e di condivision. “Armonie senza confini”, Armoniis cence confins, al è il titul dal conciert transnazionâl previodût par vinars ai 15 aes 8 e mieze sot sere tal studi dal artist Giorgio Celiberti a Udin. Un apontament che al siere il progjet “Celiberti pe UNESCO. Storie, Nature e Art”, promovût dal Club UNESCO di Udin. Daspò dal percors che e à puartât cualchi opare di Celiberti in mostre intes cjasis storichis dal Friûl, il progjet si siere cuntun event che al tradûs il so spirt in musiche. La serade e cjaparà dentri artiscj dal Friûl-Vignesie Julie, de Cravuazie e de Slovenie in trê spetacui separâts: la udinese Barbara Errico, une des vôs plui influentis dal jazz talian; il cjantant Federico Dalle Mule di Triest; e la cjantante taliane cravuate Angelica Zacchigna. (A.I.) – 14.05.2026