Tal Domo di Udin la prime di “Nei suoni dei luoghi”

Passe 150 sunadôrs dal prin di Lui e fint al mês di Dicembar, par 39 apontaments: concierts ma ancje incuintris, cjaminadis culturâls, visitis vuidadis, dut pensât par compagnâ il public ae scuvierte dai lûcs plui inmagants e “identitaris” dal Friûl-Vignesie Julie, de Slovenie e de Austrie. Di 28 agns, “Nei suoni dei luoghi” nol è dome che une rassegne di musiche e teritoris, un dai apontaments plui impuartants dal Istât, ma un viaç che al invide il public a scoltâ la musiche propit dentri dai lûcs in events che no son dome concierts, ma esperiencis di dialic cul patrimoni storic, artistic e dal paisaç. Dongje de diretore artistiche Valentina Danelon al è rivât tant che consulent Valter Sivilotti, diretôr di orchestre e riferiment a nivel talian e european. Ducj i doi a àn lavorât par meti adun un program che al è une gjeografie de scolte, bon di tornâ a dâ ai teritoris la lôr vôs plui vere, metint dongje cualitât artistiche, atenzion ai talents zovins e il spirt di là dai confins. A vierzi la rassegne, al Prin di Lui tal Domo di Udin, “Armonie inclusive”; cu la Orchestre sinfoniche inclusive AMI–Ritmea e la “Naonis”, diretis di Sivilotti. Ai 15 di Lui, la prime di cetantis incrosaduris no dome di gjenars, ma ancje di lengaçs, cul scritôr Paolo Nori e il violoncelist Enrico Bronzi e po dopo lis dedichis al gurizan Fausto Romitelli, i sunôrs pe pâs che a messedin classiche, jazz, pop, contemporanie e cetant altri. (A.I.) – 30.06.2026