Al è timp fint ai 30 di Avrîl par candidâsi par Suns Europe: il festival des arts intes lenghis minorizadis de Europe inmaneât de cooperative Informazione Friulana, editore di Radio Onde Furlane, cu la poie finanziarie de Regjon Friûl-Vignesie Julie e de ARLeF – Agjenzie Regjonâl pe Lenghe Furlane, e cu la colaborazion di publics e privâts, di chenti e internazionâi. Il Festival, che chest an al fâs 10 agns, si davuelzarà a Udin e in altris lûcs dal Friûl vie pal mês di Otubar. Il bant al è centrât su la sezion musicâl de manifestazion e si indrece a grups e musiciscj cuntune produzion artistiche fate intune des lenghis espression des comunitâts minorizadis de Europe. Il festival al à chê di dâur evidence aes propuestis calcoladis lis plui origjinâls e inovativis. Par candidâsi, i artiscj a àn di compilâ il modul te sezion di pueste dal sît www.sunseurope.com, compagnantlu cui materiâi domandâts. La selezion e sarà fate po dai organizadôrs dentri dai 30 di Mai dal 2024. I artiscj selezionâts a saran invidâts a partecipâ al festival par sunâ dal vîf lis lôr cjançons te serade finâl, in Otubar a Udin. (A.I.) – 02.04.2024
Foto di L. Chiandoni
