Suns Europe, dut pront pal grant finâl

Al è dut pront pal grant finâl di Suns Europe. Il festival des arts in lenghe minorizade – organizât de cooperative Informazione Friulana, editore di Radio Onde Furlane – , daspò di vê menât in Friûl vie pal Istât tancj apontaments di biele musiche, e no dome, al rive al Teatri Gnûf “Giovanni da Udine”, ai 26 di Novembar, pal conciertion final che al viodarà tant che protagoniscj i artiscj e i grups selezionâts par la otave edizion. A montâ parsore dal palc dal Teatri citadin a saran i miscliçs dai galês Hms Morris; une des artistis plui interessantis dal Paîs Basc, Olatz Salvador; la Sardegne dai Ealûs; il zovin cjantautôr dal Drenthe (Paîs Bas) Rick Hilberts. Spazi ancje al sloven dal Cjars cui Violoncelli Itineranti; a rapresentâ il Friûl, invezit, a sarà Massimo Silverio. (A.I.) – 08.11.2022