Di 12 agns, Udin al devente la capitâl de Europe: il continent des culturis e des comunitâts linguistichis minorizadis. Ancje chest an, “Suns Europe” al compagne il public intun viaç te produzion artistiche di cualchi paîs che si cjate dentri dai confins di un altri paîs. In program leterature, teatri e soredut musiche, cul Teatri gnûf “Giovanni da Udin” che sabide ai 10 al presentarà l’apontament principâl, il grant conciert finâl. Inmaneât ogni an de cooperative Informazione Friulana – cu la poie finanziarie de Regjon, dal Comun di Udin, dal Istitût Basc Etxepare e de Fondazioen Friuli, la colaborazion dal Comun di Codroip e di altris,”Suns Europe” al à za vût une anteprime a Bovec, e al è stât invidât in Gales e a Marsilie. Prime dal grant finâl, il festival al scjavace il Friûl cun apontaments che a metaran a confront artiscj e repertoris. Tacât tal fin de setemane a Cormons e S. Vît dal Tiliment, il program al va indenant martars ai 6 te Biblioteche “Gilberto Pressacco” di Codroip cu la prime presentazion di “Tiere sidiade”, la gnove racuelte di contis di Gianfranco Pellegrini, te suaze des iniziativis leadis al Premi leterari “S. Simon”. Simpri a Codroip, vinars ai 9, alì dal Ottagono, cualchi altre “cerce” dal conciert finâl cun Zeltia Irevire de Galizie, la furlane Momi, RTZ Kolektiboa dal Paîs Basc e Gwen dal Gales. (A.I.) – 05.10.2026
“Suns Europe” al passe par Codroip
62