Al torne ogni Vierte e cheste e sarà la cincuantesime cuinte volte pal Palio teatrale studentesco “Città di Udine”, inmaneât dal Teatro Club di Udin dal 1971: une des manifestazions di teatri zovin plui vieris e identitariis di dute la Italie. La presidente dal Teatro Club, Alessandra Pergolese, e il diretôr artistic de manifestazion, Paolo Mattotti, a àn metût dongje un mês di spetacui cun passe 500 students sul palc dal Palamostre, di simpri la cjase dal “Palio”, là che si pant ogni an un lavôr artesanâl – chel daûr dal teatri – e une incressite: chê dai fantats e des fantatis che a fasin part di chest ‘rituâl’. Di miercus ai 28 di Avrîl e fint ai 25 di Mai, il Palio al puartarà in sene 26 spetacui cun doi apontaments par serade, par cure di uns dîs scuelis di Udin (Stellini, Uccellis, Marinelli, Sello, Copernico, Malignani, Marinoni, Deganutti e il grup Radio Magica Academy) e provincie (di Cividât, Codroip, S. Denêl, Glemone, Culugne e Tarvis), ma ancje di Spilimberc e Gurize e altris realtâts: par esempli, il Teatri Stabil Furlan. Tacât cul apontament “5 minuti”, cun ducj i spetacui presentâts in struc in 5 minûts in anteprime un pâr di setemanis indaûr, il program al previôt ancje la ospitalitât de compagnie zovine che e à vinçût il “Mittelyoung” 2025, Lidi Precari, il leam cul progjet “Mistîrs de sene” e une schirie di incuintris ogni dì par contâ a ducj la storie dal teatri. (A.I.) – 28.04.2026
Foto di B. Follena
