Storiis di emigrazion dal Friûl ae Americhe dal Sud e indaûr

Cjançons, letaris, ricuarts e l’avignî de emigrazion furlane in Argjentine e in Uruguay: a son dal centri dal conciert recitât firmât di trê nons di nivel de culture furlane contemporanie, un viaç par tornâ a scuvierzi lis peraulis e lis notis plui altis de nestre tiere, lis mapis, lis tramis e lis rotis de emigrazion dal Friûl inte Americhe. “Tant che une gote di aghe que cruzó el océano” al è il titul dal spetacul che al traviersarà l’ocean, puartant valîs cjançons, poesiis e contis par rivâ a dâ vôs a chel sintiment di “scugnì là”. I trê protagoniscj “di ca su” che a laran a cirî di puartâ indevant une ricercje su lis lidrîs – e no dome – fate adun cui furlans “di là jù” a son il poete Maurizio Mattiuzza, autôr ancje di romançs e tescj di cjançons, la regjiste e atore Carlotta Del Bianco e il ghitarist e cjantautôr cjargnel Alvise Nodale, premiât dôs voltis tal 2024 e finalist al “Tenco” di chest an. Il progjet, metût adun de Famee Furlane di Montevideo e la Sociedad Furlane di Buenos Aires, cu la poie dal ent “Friuli nel Mondo” e de Regjon F-Vj, al tache ai 7 di Avost a Montevideo, tal Istitût talian di culture, e doi dîs dopo te sede de Famee Furlane. Ai 10 di Avost, la tierce tape a Buenos Aires. Po dopo, ai 4 di Setembar, “Tant che une gote di aghe que cruzó el océano” al tornarà “a cjase”, te cort di palaç Morpurgo a Udin. Tal spetacul, no dome par furlan ma ancje par talian, spagnûl, inglês…, la leterature e la musiche furlane ancje di vuê, firmade dai stes autôrs, si messede cul patrimoni des comunitâts di emigrants furlans in Sudameriche. (A.I.) – 06.08.2025