In 21 agns, e je deventade une rassegne uniche, un “festival boutique” che si fâs intun dai borcs plui biei de Italie, te place de Badie di Siest. “Sexto ‘nplugged” e je dal principi la sielte di un grup di passionâts che a àn miôr cirî la bielece te sperimentazion e tes propuestis plui origjinâls pitost che la “stele” dal moment. Cheste ricercje e sta benissim là che la storie e la art si cjatin cu la musiche contemporanie intun progjet culturâl che al à fat cognossi il paîs a ducj. La associazion Sexto ‘Nplugged dal president Mauro Morassut e à metût adun ancje chest an un program di nivel in cuatri seradis une daûr di chê altre, dai 2 ai 5 di Lui. Si tache cuntune imbinade dute inglês: The New Puritans, formazion visionarie e sperimentâl e i WU LYF (World Unite Lucifer Youth Foundation), un “cult” pai passionâts di indie rock e post-punk, a pene tornâts a sunâ adun. Ai 3 il Mago del Gelato, un grup talian che al messede i gjenars, e i olandês Altın Gün. Ai 4, serade di eletroniche cui talians JoyCut e il todesc Apparat, te uniche date dal Nord de Italie. Ai 5 si siere cun I Cani, ma la rassegne e va indevant fint al mês di Avost cu lis propuestis di “Convergenze”, te centrâl idroeletriche di Malnîs. (A.I.) – 01.07.2026
Foto di J. Young
