“Si vîf” di musiche e di poesie

Daspò de anteprime vie pal Istât, al è tornât al cine – miercus ai 18 tal “Cinemazero” di Pordenon e ai 17 di Zenâr tal “David“ di Tumieç, dopo la scree a Udin – il documentari di Dorino Minigutti “Si vîf. Une vite di musicant”, dedicât al cjantautôr cjargnel Luigi Maieron, “che al à savût – doprant propit lis peraulis dal autôr – disfâ il sâl dal dolôr tal cjant di une poesie”. Il cine, dut par furlan, al è un dialic jenfri Minigutti e Maieron, là che e ven fûr soredut la storie di un om, ancjemò prime che dal artist, bon di pandi lis sôs fragjilitâts. Un cjantautôr che al à doprât lis peraulis “Si vîf” – che par furlan al vûl dî soredut “si va indevant” – ancje pal titul di un dai siei discs plui preseâts. Chel che lu à fat cognossi in dute Italie, jessût tal 2002. I temis personâls a deventin universâls te sô musiche e intai tescj des sôs cjançons: i rapuarts dai fîs cun pari e mari, il timp che al passe, l’amôr, la muart. Dut intun, de storie di Maieron a vegnin fûr in maniere clare i detais di une epoche e di un teritori, la Cjargne. (A.I.) – 16.12.2024