Shakespeare par furlan e altris lenghis

E sarà une prime assolude chê in program joibe ai 24 te glesie di S. Francesc, a Cividât, cuant che “Elsinore” e debutarà par Mittelfest 2025. Il spetacul, firmât di Paolo Antonio Simioni e produsût dal Centro Teatro dei Navigli in colaborazion cu la ARLeF – Agjenzie regjonâl pe lenghe furlane e Mittelfest 2025, al puartarà al public une esperience teatrâl buine di passâ i confins linguistics e di valorizâ la lenghe furlane intun contest di dialic multiculturâl e multilengâl , propit come che al sucêt ogni dì in Friûl. Il spetacul al sarà metût in sene in cuatri lenghis – furlan, talian, ongjarês e inglês – ma al rivarà a fevelâ a ducj, in graciis de fuarce espressive di EuAct, che e ponte a passâ i ostacui linguistics midiant di une metodiche che si fonde su la azion fisiche e su la autenticitât emotive. Il personaç di Amlothi, interpretât di Paolo Antonio Simioni, al fevelarà par furlan in omaç ae tiere che e darà bon acet al spetacul, invezit chei altris si alternaran intun multilinguisim che al è spieli dal Friûl. “Elsinore” no sarà une rileture dal Amlet shakespearian, ma une riscriture inlidrisade intal mît origjinari e te conte dal storic danês Saxo Grammaticus. Un viaç metafisic e visionari, là che la fantasime dal pari di Amlet (Amlothi) e deventarà la puarte par une altre dimension, che dal “oltri”, di dulà che la conte umane e interiôr dai personaçs e cjaparà forme. (A.I.) – 23.07.2025