Sessante agns di cjançon furlane

Cuant che al è tacât, tal 1959 a Pradaman par iniziative de Scuele Libare Furlane e di cualchi innomenât studiôs de lenghe furlane (pre Domenico Zanier, Tarcisio Todero e ancje Mario Argante), il Festival de cjançon furlane al è stât par agnorums un dai events musicâi plui impuartants de regjon. Tai agns Sessante e Setante, tal parc de vile Giacomelli, no rivavin dome miârs di spetatôrs e cjantants di chenti, ma ancje grancj nons dal mont dal spetacul talian: Enzo Tortora, Enrico Montesano, Lino Toffolo, Gino Bramieri, Ric e Gian, Wilma De Angelis, Memo Remigi, Cochi e Renato… Cressût vie pal timp, dal 1977 ai agns Otante il festival al fo ospitât tal palasport “Carnera” di Udin, l’unic lûc che al veve avonde puescj par contentâ ducj! Planc a planc, la rassegne puartade indevant di Bruno Sincerotto te version storiche e je dut câs lade a sierâsi. Tal 2010, il festival al è tornât, cincuante agns daspò de nassite, cun cualchi edizion tal Teatri gnûf “Giovanni da Udine” e lis gnûfs vôs di chenti – simpri di nivel cetant alt – compagnadis de Orchestre sinfoniche regjonâl. Daspò di une piçule polse di sîs agns, il festival al torne ancjemò une volte par volontât di Renato Pontoni, “l’erêt” e sucessôr di Sincerotto ae vuide di une rassegne che no à cambiât il so fin: valorizâ la lenghe e la culture furlane midiant gnovis produzions musicâls, tun moment là che la musiche e je cambiade fint insom a pet de rassegne origjinâl, e forsit ancje di chê tornade a meti sù tal gnûf secul. Par cheste gnove fase de sô storie, la cjançon par furlan e torne, o miôr e reste – tal cûr de citât di Udin, ma dentri di un dai events plui preseâts de regjon: “Friuli Doc”, là che ai 10 di Setembar si fasarà la serade finâl, inmaneade de associazion musicâl e culturâl Armonie dal president Mattia Mestroni cu la colaborazion di Pregi. Sul palc, a compagnâ lis vôs che a saran selezionadis, une orchestre dal vîf direte di Rudy Fantin, che al cjape il testemoni e la ‘bachete’ di Walter Sivilotti, par agns diretôr artistic dal festival de cjançon furlane. Fint ai 15 di Jugn al è timp par cui che al vûl partecipâ di notâsi al bant dal concors cun tocs che no son stâts za publicâts (dutis lis informazions, lis regulis e vie indevant si cjatin in ret su: www.festivaldellacanzonefriulana.it). Il comitât artistic formât di Fantin, Marco Bianchi e Fabrizio Fontanot e une jurie di esperts vuidade di Enrico Brun a sielzaran i 15 tocs pe finâl dai 10 di Setembar. (A.I.) – 12.04.2026