S. Denêl crosere di musichis cun “Folkest”

Dai 3 ai 5 di Lui, S. Denêl al torne al centri di Folkest e une crosere des musichis dal mont e de cjançon di autôr, cun apontaments tes glesiis dal centri, tes ostariis e te Biblioteche Guarneriana. I ospits plui impuartants dai dîs centrâi dal festival a son Omar Pedrini, che al sierarà la ultime serade (domenie ai 5), e i Perturbazione, che sunaran une gnove version de “La buona novella” di Fabrizio De André (sabide ai 4). Il festival si vierzarà cul duet Zerofolk, vincidôrs dal Premi “Cesa” dal 2025 (vinars ai 3) e Luisa Briguglio, vincidore dal Premi “Andrea Parodi”. Vie pes trê zornadis e je in program ancje la vincjesime seconde edizion dal Premi “Alberto Cesa” pai gnûfs talents de musiche folk taliane, che al à cjapât sù passe 150 candidaturis di dute Italie e al à selezionât i cinc finaliscj. I finaliscj a saran ancje clamâts a confrontâsi cuntune prove di “identitât” metint in musiche e cjantant un test par furlan dal poete Federico Tavan. L’altri event difondût tal centri, dongje dai concierts di “Musica tra la gente” tes ostariis, al sarà il “Folkest Showcase”, la vetrine internazionâl sostignude de bande de plateforme europeane UpBeat, che e met dongje 14 festival continentâi, puartant artiscj, professioniscj dal setôr, produtôrs e gjornaliscj di dute Europe a S. Denêl. (A.I.) – 02.07.2026