S. Denêl compagn di New York tal 1930

L’auditorium “Alla Fratta” di S. Denêl al mude par une serade intal club di musiche jazz plui cognossût di dute New York, in gracie de Trieste Early Jazz Orchestre, che e je protagoniste in “Una notte al Cotton Club” (Une gnot al Cotton Club), miercus ai 18 te suaze de stagjon teatrâl promovude dal comun e dal circuit dal ERT. La orchestre di Triest, specializade tal repertori dai prins agns de musiche jazz, e met dongje cualchidun dai miôr musiciscj de sene regjonâl e di chê slovene, atîfs ancje a nivel internazionâl, par esplorâ il jazz de metât dai agns Vincj dal secul passât fint ae metât dai agns Trente. Il jazz di Duke Ellington, Fletcher Henderson e George Gershwin al puartarà il public dentri dal storic Cotton Club di New York, cun ancje un cjantant compagn di chei di chê volte, Paolo Venier, e la balerine Greta Rizzotti. (A.I.) – 17.03.2026