Ridi in blanc e neri par sierâ la stagjon

I Papu a sierin sabide ai 28 la stagjon teatrâl 2025/2026 di Prissinins, promovude de aministrazion comunâl e dal circuit ERT. La cubie di Pordenon e larà in sene aes 8:45 sot sere tal auditorium comunâl cun “Vintage, comedie in blanc e neri”, une selezion dai miôr tocs comics dal vincjesim secul, interpretâts di Andrea Appi e Ramiro Besa. Chest spetacul al è dedicât al ricuart di une comedie che no esist plui e ae television in blanc e neri, che e trasmeteve chei piçui spetacui memorabii di autôrs e atôrs di cualitâts che forsit no si cjataran plui a chest nivel in dì di vuê. La sfide dai Papu e scomence in regjon cun Angelo Cecchelin, un comic nassût a Triest tai agns vincj dal 1900. Daspò, lis selezions gjavadis fûr dai comics plui innomenâts dai agns Cuarante, Cincuante, Sessante e Setante dal secul passât. (A.I.) – 26.03.2026