Resistence eco culturâl li dai Colonos di Vilecjaze

Resistence eco culturâl midiant di une lenghe sivilade, vinars ai 6 li da Colonos di Vilecjaze di Listize. La atore e autore di teatri Marta Cuscunà e sarà in dialic cu la antropolighe Giustina Selvelli, cu la introduzion di Federico Rossi, par fevelâ dal “Silbo gomero”, il lengaç sivilât che si dopre di simpri te isule La Gomera, tal arcipelac da lis Canariis, par comunicâ a distance, riprodusint lis carateristichis sonoris di une lenghe cjacarade. A cheste lenghe in pericul di estinzion, Marta Cuscunà e à dedicât un spetacul “site-specific” intitulât “Bucolica. Paesaggio con fischiatori, pecore e umani”; il test dal copion al è publicât tal gnûf volum “Sguardi di specie. Una trilogia ecofemminista”, che al ven presentât pe prime volte: une trilogjie dramaturgjiche insiorade di saçs e narazions no antropocentrichis che a pandin visions politichis gnovis par progjetâ il doman cuntun voli a dutis lis speciis. (A.I.) – 05.06.2025