Prime il premi a Rome, po dopo a Monfalcon

Di zovin al jere il cjantant di un grup metal une vore innomenât in regjon, cumò al è diretôr di cualchi corâl cuntune lungje ativitât, ma al lavore ancje te suaze de terapie cu la musiche. Nassût tal 1969 a Monfalcon, ancje autôr dai cjants pal cine “Zoran Il mio nipote scemo”, Massimo Devitor al à vinçût la tierce edizion dal Premi Santercole, inmaneât a Rome par memoreâ Gino Santercole, cjantautôr che al jere nassût dentri dal “Clan” di Celentano. Devitor al à cjapât il premi pe miôr “cover”, ven a stâi la interpretazion di un toc di Santercole, “You Think and You Think”, ma al à presentât ancje un toc gnûf , “Cuore di Marte. Canto di un guerriero troiano”, e cussì al sarà ospit dal MEI, la cunvigne des etichetis indipendentis. Tornât a cjase, al à cjatât une altre sorprese: l’omaç dal Comun di Monfalcon a lui e ai sunadôrs dal grup che lu à compagnât a Rome e vinci il premi. A consegnâ il premi, il sindic Luca Fasan e la assessore comunâl Irene Cristin (A.I.) – 25.06.2026