“Prime di sere”: ve un cine di liende

Il parc “Loris Fortuna” in Zardin Grant a Udin al dâ acet vinars ai 3 a un event impuartant par cui che al presee il cine di autôr e la culture furlane: la proiezion di “Prime di sere”, il luncmetraç di Lauro Pittini basât sul romanç cul stes non scrit di Carlo Sgorlon, publicât de Filologjiche. Zirât dal 1992 al 1993 tune schirie di puescj tal Friûl di mieç, al è un dai rârs cines dramatics interpretâts in lenghe furlan cun atôrs no professionâi di chenti. La pelicule e je un riferiment dal cine neorealist ambientât in Friûl, dongje di “Gli ultimi” di Vito Pandolfi e David Maria Turoldo e “Maria Zef” di Vittorio Cottafavi. La serade, condusude di Erika Adami, e sarà inricjide de presince dal regjist Lauro Pittini e dai protagoniscj origjinâi dal cine, che a saran in dialic cul public. (A.I.) – 02.07.2026