Premi “Cesa” in Friûl, prime tape pal “Folkest”

La gnove edizion dal Folkest, la rassegne di musiche che si davuelç dal 1979 in Friûl e che di cualchi an e je tornade propit la che e jere scomençade, a S. Denêl, e je za in vore. Joibe ai 5 di Fevrâr al rive in regjon il premi “Alberto Cesa”; un progjet unic, dedicât a une des figuris rapresentativis dal “folk revival” talian e pensât par dâ lustri aes realtâts che a fasin ricercje musicâl cjalant ae identitât dal teritori. Daspò de prime fase di valutazion e la viertidure a Arezzo, la vincjesime seconde edizion dal premi e je daûr a zirâ la Italie par sielzi i cinc grups o soliscj che tal mês di Lui a sunaran sul palc di Folkest. Lis semifinâls a son za tacadis, si che duncje joibe ai 5 il premi al rive li dal “Ottagono” di Codroipo, la che a sunaran Accordòs, Barrio Alto e I Cani Sciolti del Mondo Roverso. Ancje chest an, chei che a saran in finâl a varan di meti in musiche e cjantâ un test par furlan dal poete Federico Tavan., un omaç fat in colaborazion cun Morganti Editori. (A.I.) – 04.02.2026