Pordenon e torne capitâl dal “cine dal reâl”

Di miercus ai 25 e fint ai 29 di Març, Pordenon e torne la capitâl dal “cine dal reâl”, un dai prins apontaments in Europe dedicâts al documentari, vie pe strade che e mene ae capitâl taliane de culture tal 2027. La gnove edizion dal “Pordenone Docs Fest” e à fat une sielte clare: intun moment che là che o sin ducj dentri di un sglavin di imagjinis, une daûr di chê altre, cence polse, al è miôr fermâsi un moment a viodi ce che al sucêt cun plui precision. Cjapant dut il timp che al covente. I grancj documentaris di vuê a tornin a meti al centri lis sieltis di ognidun e la responsabilitât dal om: par chel e je nassude une gnove sezion che e fronte i temis dal dì di vuê cence fâ o cirî spetacul, cuntun voli plui uman. In program desenis di proiezions e ospits di dut il mont. Di chei, la anteprime nazionâl di “Peacemaker” dal cravuat Ivan Ramljak, une riflession sui Balcans îr e vuê,ma ancje chê di”A Fox Under a Pink Moon” di Mehrdad Oskouei, il diari di une zovine artiste afghane in Iran. E “The Longer You Bleed” di Ewan Waddell, che al conte ce che al sucêt pardabon a un grup di zovins de Ucraine. A Pordenon si viodaran ancje lis storiis di feminis di Nicole Scherg (“Wise Women”) de cinese Mo Tan (“ Confessions of a Mole”) e de produzion mieç turche mieç iraniane “32 Meters”. Dongje dai cines, une schirie di incuintris par professioniscj dal setôr e ancje par talents zovins. (A.I.) – 24.03.2026