“Penne nere”: gnove edizion pal prin cine zirât in Friûl

Il Friûl che al dì di vuê al ven sielt di cetantis produzions cinematografichis ancje internazionâls al à tacât a jessi un lûc pal cine za passe setante agns indaûr. Al è sucedût cuant che un grup di lavoradôrs di Cinecittà al rivà di Rome fint in Cjargne par zirâ a Sauris, Vile e Tumieç il cine “Penne nere” di Oreste Biancoli, cun Marcello Mastroianni, Marina Vlady e Enzo Staiola. Jessût tal 1952, al rive prime di “Addio alle armi”, il kolossal che tal 1957 al puartarà Hollywood in Friuli, e “La grande guerra” di Mario Monicelli. La Cineteca del Friuli, che e conserve il cine tal formât origjinâl su pelicule, lu fâs viodi pe prime volte te version restaurade in 4K, joibe ai 15 tal Visionario di Udin te suaze de Setemane de culture furlane. A presentâ il cine, l’espert Carlo Gaberscek. (A.I.) – 14.05.2025