Pat Metheny, la prime stele jazz a Udin

Deventade un riferiment talian e european, la rassegne internazionâl “Udin&jazz” e tache joibe ai 2 cuntune anteprime sul plaçâl dal cjistiel: il conciert dal mestri de ghitare jazz moderne Pat Metheny, aromai di cjase a Udin, che al rive cuntun gnûf progjet in prime nazionâl, compagnât di talents zovins: “Side-Eye III+”. La rassegne inmaneade de associazion Euritmica di Udin e viodarà grandis stelis di îr, vuê e doman, cun dopli (o ancje plui) conciert ogni dì dai 11 ai 18 di Lui e une schirie di altris apontaments. Par altris nûf zornadis, apontaments no dome sul cjistiel, ma ancje tal parc Moretti e tal zardin “Loris Fortuna”, te cort Morpurgo e sot de loze dal Lionello. I nons sielts dal diretôr artistic Giancarlo Velliscig a son tancj: il bassist Marcus Miller cuntun concierton plen di altris stelis pai 100 agns di Miles Davis; il visionari Jacob Collier – il plui preseât dai zovins -, che al sunarà a Lignan cu la Naonis Orchestra direte dal nestri Valter Sivilotti. Une serade di musiche “nere” cun Baba Sissoko e Nik West, il conciert pe pâs di Francesco Bearzatti, il talent zovin de ghitare Matteo Mancuso, i un non pôc cognossût ma che al sarà une sorprese, MonoNeon, e une schirie cence fin di altris concierts. Il prin al sarà simpri joibe ai 2 aes 7 sot sere te cort Morpurgo cuntun omaç al jazz classic de citât di Udin par cure dal Kormôr Jazz Collective. (A.I.) – 01.07.2026