Pasolini e Mishima, doi muarts in dialic

La cuinte stagjon teatrâl dal Teatri Stabil Furlan, titulade “Savôrs” e curade dal diretôr artistic Massimo Somaglino, si siere cul drame sonôr “Mishima – Pasolini: Dialic fint ae muart”, pensât e disvilupât di Marco Maria Tosolini, che al debute tal Teatri “Paolo Maurensig” di Felet miercus ai 24 aes 8 e mieze sot sere. I doi grancj poetis e autôrs di cines Yukio Mishima (1925-1970) e Pier Paolo Pasolini (1922-1975), deventâts aromai spirts intun mont di là indefinît (si che duncje no religjôs), si cjatin e a fasin lûs ator di aspiets diferents des lôr vitis e des lôr personalitâts, scuvierzint alc in comun e alc altri che ur slontane. E scomence cussì une conversazion strane, une sorte di duel concetuâl, fonetic, etic e lessicâl, dulà che i rûi a son dispès savoltâts. I dialics di Nicola Fraccalaglio (Pasolini), Sunshuke Senda (Mishima) e Paola Bacchetti (l’oracul) a son in cetantis lenghis – talian, gjaponês, furlan, grêc antîc -, alternâts cun musichis di Johann Sebastian Bach, compositôrs europeans cults e vilotis furlanis, dut cuant dentri des sonoritâts licuidis di Alessandro Seravalle. (A.I.) – 23.06.2026