Paolo Fresu al rive fint a Tramonç Disore

A Tramonç Disore, tal spazi difûr de sale polivalent, al rive l’apontament centrâl de rassegne “La Mont che no tu ti spietis”. Domenie ai 2 di Avost, aes cinc e mieze di dopomisdì, “Two for Tree” al è un dialic poetic jenfri sunôr e nature, improvisazion, scriture orchestrâl e paisaç. I protagoniscj di chest grant conciert a son Paolo Fresu a la trombe e la eletroniche, Daniele Di Bonaventura ae armoniche argjentine (il “bandoneon”) la orchestre di cjamare di Perugia, intun progjet speciâl nassût di une sensibilitât condividude viers lis cuistions ambientâls e di une colaborazion artistiche che e va indevant di tant timp. Il conciert al previôt ancje il supuart de Orchestre di arcs Blanc, un grup cu la sede propit in paîs, dut dedicât ai struments a cuarde, fat di musiciscj atîfs in grandis orchestris talianis e di zovins strumentiscj di chenti sot dai 35 agns. (A.I.) – 31.07.2026