Orchestre di pâs in timp di vuere

Pordenon al clame la Ucraine, intal segn de musiche. Dut al è pront pal conciert di fin dal an che sabide ai 31, aes 4 dopomisdì al Teatri Verdi, e viodarà protagoniste la Karkhiv Philarmonic Orchestra. La innomenade formazion ucraine fondade intal 1932, cuntun organic di plui di 100 elements, za l’an passât si jere esibide intal conciert promovût dal Centro Iniziative Culturali di Pordenon. E torne intun contest cambiât in maniere dramatiche. A vuidâle al sarà ancje chest an Yuriy Yanko, diretôr artistic e musicâl dal grup. “O sin grâts a Pordenon e ae Italie pe ospitalitât – al à declarât – , pe poie e par l’amôr che nus mostrin il popul e il guvier talian. Nol è stât facil preparâ il conciert, ma sunâ cu la nestre orchestre e vûl dî promovi i valôrs de pâs”. (A.I.) – 28.12.2022