Oleotto, l’ultin cine di Rabil a Rome

Il gnûf cine dal regjist gurizan Matteo Oletto, “Ultimo schiaffo”, al sarà presentât te sezion autonome “Alice nella Città”, dentri dal festival dal cine di Rome, che al va indevant fint a vinars ai 26. Il cine al è une comedie “nere” cuasi di Nadâl, cun protagoniscj Giuseppe Battiston e i zovins Adalgisa Manfrida e Massimiliano Motta. Zirât tal borc minerari di Rabil in graciis de Friuli Venezia Giulia Film Commission – PromoTurismoFVG e dal fonts regjonâl dal audiovisîf, al conte la vite di doi fredis cence bêçs e plens di frêt. Oleotto al puarte indevant la esplorazion de provincie tacade cun “Zoran, il mio nipote scemo”. (A.I.) – 24.09.2025