Nadâl in Filologjiche, si tache cun Straulino

da Andrea Ioime

A tachin i incuintris inte suaze de rassegne “Nadâl in Filologjiche”, che la Societât Filologjiche Furlane e inmanee inte sô sede di palaç Mantica in vie Manin 18 a Udin pal mês di Dicembar, cul contribût dal Comun di Udin. Joibe ai 7 di Dicembar aes 8 e mieze di sere al sarà ospit il cjantautôr cjargnel Lino Straulino, che al fasarà scoltâ cualchidune des composizions di Tite Grison – Giovanni Battista Marzuttini – tal ricuart dai 160 agns de sô nassite e dai 80 de muart. Personaç cun mil musis artistichis, Tite Grison al jere nassût a Udin ai 9 di Fevrâr dal 1863 e muart a Favuiis di Gonârs, li che al veve vivût i ultins agns, al prin di Dicembar dal 1943. Al è stât musicist, fotograf, poete, pitôr, inzegnîr. Tant che musicist al è innomenât massime par vê scrit uns trente vilotis par furlan su tescj siei, di Pieri Çorut, di Bindo Chiurlo e di altris, che al à vût publicât su la riviste «Ce fastu?», intun album so tal 1930 e intes racueltis de Societât Filologjiche. Cun Straulino a saran ancje lis vôs di Agnese e Anastasia Fabbro. La jentrade e je libare e a gratis. (A.I.) – 06.12.2023

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui